အခြေခံပညာသင် ကျောင်းများတွင် ဆရာများ ကျောင်းသားများအပေါ် သင်ကြားမှု မကောင်းပါက ဆရာလဲလှယ်ပေးရန် ကျောင်းသား မိဘများက တောင်းဆိုခွင့် ရှိကြာင်း ကျိုင်းတုံမြို့ ဝမ်လင်ကျေးရွာ အခြေခံပညာ မူလတန်းလွန်ကျောင်း ကျောင်းအုပ်ကြီး ဒေါ်ခင်စန်းတင့်က The Voice သို့ ပြောကြားသည်။
“ဘယ် ဆရာကို မကြိုက်ဘူး။ အသင်အပြ မကောင်းလို့ လဲပေးပါလို့ ကျောင်းသားမိဘတွေ ပြန်ပြောပိုင်ခွင့် ရှိပြီ” ဟု ၎င်းကဆိုသည်။
အဆိုပါ အကြောင်းအရာကို အောက်တိုဘာလ ၂ ရက်နေ့က ပြုလုပ်သော ပညာရေးဝန်ကြီးဌာနနှင့် UNICEF တို့ ပူးပေါင်း၍ အရည်အသွေးရှိ အခြေခံပညာ စီမံချက်အဖြစ် ကလေးပျော်ကျောင်းများ ဖြစ်လာစေရန် မိဘဆရာအသင်းများ စွမ်းဆောင်ရည် မြင့်မားရေး လုပ်ငန်းဆွေး နွေးပွဲတွင် ယင်းကျောင်းအုပ်ကြီးက ပြောကြားခဲ့ခြင်း ဖြစ်သည်။
“ကလေးတွေကို ဆရာကရိုက်နှက်နေရင် အဲဒီဆရာကို ကြောက်ပြီး ကလေးပျော်ကျောင်း ဖြစ်လာမှာ မဟုတ်တော့ဘူး” ဟုလည်း ၎င်းကထပ်လောင်းဆိုသည်။
ကျိုင်းတုံမြို့နယ် အတွင်းရှိ အခြေခံပညာကျောင်းပေါင်း ၆၀ မှ ကျောင်းအုပ်ကြီးများကို ကလေးပျော် ကျောင်းများ ဖြစ်လာစေရန် စွမ်းဆောင်ရည် မြင့်မားရေးအတွက် သင်တန်း ငါးရက်ကြာ ပို့ချထားပြီး ယင်းကျောင်း ၆၀ ကို နယ်မြေ ရှစ်အုပ်စုခွဲကာ မိဘဆရာ စွမ်းဆောင်ရည် မြင့်မားရေးလုပ်ငန်း ဆွေးနွေးပွဲများ ကျင်းပခြင်း ဖြစ်ကြောင်း ယင်းမြို့နယ် ပညာရေးမှူးရုံးမှ သိရသည်။
The Voice Weekly
Post a Comment